नेपाली हास्यव्यङ्ग्य अनलाइन पत्रिका

परशुराम पराशर :

कार्यकर्ता र नेता नै लुतो हुन् यस देशका
न्यायाधीश लुतो बन्ने होड पो चल्छ देशमा
नागरिक सबै हामी कन्याउने कता कति
निकोपारी लुतोलाई जोगाऔँ देशको खती ।

महालुतो यहीँ नै छ आजै लौ फाल्नुपर्दछ
चिलाउने लुतोलाई किन पो पाल्नुपर्दछ ?
कुर्सी नै चाहिने रैछ, लुतै लुतो बने सब
रोग व्याधि यिनी नै हुन्, फालौँ, देश बनोस् अब ।

हिँड्दैनन् उड्दछन्, गुड्छन् कतै जानुपरे पनि
मार्सी नै खोज्दछन्, रोज्छन् काहीँ खानुपरे पनि ।
स्वार्थको मोहमा पर्दै लुतो बने सबैतिर
दुःखमात्र दिने रैछन् कन्याऊँ कति आखिर ।

लुतोले छोपियो देश, फाल्ने हो यो कसो गरी
बस्दैनौँ अब लौ हामी, फाली छाड्छौँ जसो गरी ।
नजाने हो भने फाल्दा गन्दे झार लगाउँछौं
जसरी हुन्छ यो वैरी लुतोलाई भगाउँछौँ ।

०००
जुरोपानी, झापा