नारायण भट्टराईकोहि छ मलाई श्रद्धान्जली भन्ने ?
अवसरको खडेरीलाई छल्न ऋणको भारी बोकेर विदेशी घाममा पसिनाको बिस्कुनमा सपना सुकाउँदा सुकाउँदै जलेर शहीद भएको म कोही छ मलाई समवेदना दिने ?
नारायण भट्टराई :
इमान्दारिताको बाटो हिँड्न खोज्दा
बेइमानीहरूको पासोमा परेर
पटक पटक
शहीद भएको म
सक्कली शिक्षकले पठाएका
भाडाका मान्छेले पढाएर
पटक पटक परीक्षामा गुल्टिएर
शहीद भएको म
व्यापार व्यवसाय गर्न खोज्दा
माफियाको फन्दामा परेर
बाउ बाजेले नङ्ग्रा ख्याएर आर्जेको
भए भरको सम्पत्ति गुमाएर शहीद भएको म
राजनीतिको पुच्छरमा झुन्डिएर
जता पुच्छरले तान्छ त्यतै तानिदै
चोक्टा खान जाँदा झोलमा
डुबेर शहीद भएको म
अवसरको खडेरीलाई छल्न
ऋणको भारी बोकेर विदेशी घाममा
पसिनाको बिस्कुनमा सपना सुकाउँदा सुकाउँदै
जलेर शहीद भएको म
कोही छ मलाई समवेदना दिने ?
०००
