नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’ :

बालकोटको बारदली बन्यो दरबार
सत्ताभोगी भातेलाई भयो होनहार ।
अटालीमा अटाएका टाउके बसीबसी
टाउके र लाउकेले पारेका छन् खसी ॥

खसी पर्ने जति कठै ! विदेशमा लागे
विद्यार्थी र परिश्रमी उतैतिर भागे ।
बस्न-खान नसकिने ल्याएका छन् नीति
विकृति र विसङ्गति बसेको छ थिति ॥

कौसीबाट विकारको भल बगेको छ
जनताका आँगनमा ढल ढलेको छ ।
बालुवाको टारबाट बागमती बग्यो
जनताको सुखशान्ति, समुन्नति लग्यो ॥

बागमती सफाइको नाट्यशाला चल्यो
नाइकेका गोजीभित्र हीरामोती फल्यो ।
ढलमती बगेको छ बागमतीभित्र
भित्रभित्रै बनेको छ हन्तकाले चित्र ॥

बुढानील-कण्ठ बसे बुढी समाएर
परिश्रमी पठाउँछन् भेटी कमाएर ।
बालुवाको टारमाथि पानीसरि मनी
खन्याउँदा परदेश भएको छ धनी ॥

परदेश पुर्‍याए लाउकेले ।
बस्न-खान दिएनन् टाउकेले ॥

०००
नागार्जुन न.पा.-१, रानीवन, काठमाडौं