नेपाली हास्यव्यङ्ग्य अनलाइन पत्रिका

विज्ञान त्रिपाठी :

बझाङ बाजुराबाट आउनेको कोटेश्वर यहीँ छ
पोखरा भैरहवाबाट आउनेको टि.यु विमानस्थल
यहीँ छ कयौंको एकमात्र सपना यहीँ छ
लाखौँको एकमात्र विपना यहीँ छ
आकाश नै छुन खोज्ने कलाकार यहीँ छ
पातालमा बामै सरिरहेको खडदार यहीँ छ ।

नमस्कार तपाईंलाई काठमाडौंमा स्वागत छ ।

हजारौँको गाली खाई छाती फुलाउने
नकचरा यहीँ छ त्यही छाती बनाउन,
जिम जाने बानी यहीँ छ
हावाबाजी गर्ने खानी यहीँ छ
भई नभई देखाउन खोज्नेको ताँती यहीँ छ
पैसा छ ? छ भने काम चलाउ आफन्त यहीँ छ
खोजिराख्नु पर्दैन हजुर,
साथी एवम् जीवन साथी यहीँ छ

नमस्कार, तपाईंको विमान काठमाडौंमा अवतरण भइसकेको छ ।

मेरो सपना यहीँ छ,
तिम्रो कन्सलटेन्सी यहीँ छ
मेरो पशुपति यहीँ छ तिम्रो क्लब यहीँ छ
मेरो आशा यहीँ छ
तिम्रो निराशा यहीँ छ
बल्ल तुल्ल +2 पास हुनेको अमेरिकाको सपना यहीँ छ
राम्रोसँग पास हुनेको लोकसेवा यहीँ छ
ढलौटको करुवा यहीँ छ स्टिलको थाल यहीँ छ
बटारिएर हिँड्नेको घिनलाग्दो चाल यहीँ छ
सिंहदरबार यहीँ छ सासंद भवन यहीँ छ
त्यहाँ पस्न जनताको सपना हत्या गर्ने व्यक्ति यहीँ छ

भतुवा यहीँ छ, बटुवा यहीँ छ, छट्टु यहीँ छ
भ्रष्टाचार र कमिसनको भरमा घर चलाउन पट्टु यहीँ छ
महिला सिट यहीँ छ
चिया संग धूमपानको बिट यहीँ छ

झरौँ झरौँ कोटेश्वर आइपुग्यो ।

आज्ञाकारी छात्र यहीँ छ
कुलतमा फसेको नालायक पात्र यहीँ छ
कथा यहीँ छ कथाको सारांश यहीँ छ
ढलान यहीँ छ जस्ता यहीँ छ
मानवता बिनाको मानव यहीँ छ
धुँवा यहीँ छ धुलो यहीँ छ
न्याय हराएको दुलो यहीँ छ
हासोँ यहीँ छ हासोँ पछाडी लुकिरहेको आसुँ यहीँ छ
दसा यहीँ छ दशैँ यहीँ छ
मान्छे भन्दा बढी कुकुरको किमत यहीँ छ
उद्घाटन गरिरहनु पर्ने मेलम्ची यहीँ छ ।

अहो ! निकै फोहोर रहेछ कैले छ हौ अर्को गाडी

पैसा यहीँ छ त्यसमा घुमिरहेको हैजा यहीँ छ
टुरिजम यहीँ छ, बाको प्रिय कम्युनिजम यहीँ छ
सुविधा यहीँ छ द्विविधा यहीँ छ
ब्लुलाई हरियो भन्ने पुरानो पुस्ता यहीँ छ
भेजबाट भिगन हुने नाति यहीँ छ
सुन्नुहोस् पैसाको घमण्ड यहीँ छ
बुझ्नुहोस् आर्यघाट उ त्यहीँ छ
पढ्दा पढदै आफ्नै कथा व्यथा होकि भन्ने कविता यहीँ छ ।

गाको ल यहाँ त निकै कष्ट पो रहेछ ।

०००
काठमाडौं