नेपाली हास्यव्यङ्ग्य अनलाइन पत्रिका

रामप्रसाद पन्थी :

पुस्तक पढ्ने जमाना गयो भन्दछ दुनियाँ
पढ्दैन कोही पुराना शास्त्र भन्दछे भुनियाँ ।

प्रविधि आयो बुर्कुसी मार्दै बेहोसी बनायो
चेतना शून्य बनायो मान्छे डुङ्डुङी गनायो ।

खाँदैनन् भात छोरा र छोरी युटुव नहेरी
जवान पुस्ता विद्यार्थी युवा बन्दैछ अटेरी ।

पढ्दैन कोही पुराण गीता चिन्तन गर्दैन
मर्दा र पर्दा मानव अर्को अगाडि सर्दैन ।

अपढ मूर्ख मिल्दैन भन्न पठित सबै छन्
नेटमा पढ्ने नेटमा रम्ने जमात धेरै छन् ।

चौबीसै घण्टा पढेर बस्छन् मुहार पुस्तक
फुरूङ्ग भई पढ्दछन् सबै भिडियो टिक्टक ।

गुगल गुरु साथमा सधैँ के दुःख ज्ञानको
प्रविधि छोडी पुस्तक घर धाउँछ भन को ?

शिक्षामा ठूलो भएमा देन पुस्तकालयको
लगानी गर्ने दायित्व भित्र पर्दैन किन यो ?

पुस्तक घर हरेक वडा गाउँमा कहाँ छन्
स्रोतको कमी हुनाले केही थला नै पर्या छन् ।

पत्रिका कोही पढ्दैन यहाँ पुस्तक किन्दैन
पुस्तकालय ज्ञानको स्रोत भनेर चिन्दैन ।

दिवस मान सर्कार भन्छ लगानी गर्दैन
कुरामा पर्छ पुस्तकालय काममा पर्दैन ।

भदौको पन्ध्र पुस्तकालय दिवस जानेर
मान्नैका लागि दिवस मानौं कर्तव्य ठानेर ।

०००
रेसुङ्गा न पा २, गुल्मी