नेपाली हास्यव्यङ्ग्य अनलाइन पत्रिका

गायत्री परिराेशनी :

आज प्रेम दिवस अर्थात
फेब्रवरी –१४
हो साँच्ची अहिले
प्रेमको हाटबजार फस्टाएको छ
पिर नमान्नुहोस्,
मूल्यवृद्धि र मुद्रास्फीतिको
किन कि,
प्रेमको मूल्य निकै सस्तिएको छ ।

गुलाबको रातो एउटा,
निर्जीव फूलसँग
किन्न पाइने प्रेम
एक कप, एक प्याक
चिया, कफि र अल्कोहलको
चुस्की सँगै,
निल्न पाइने प्रेम ।

तारे होटलको
सुनसान कोठामा
एकरात विताउन किनिने प्रेम
चटपट, पानीपुरी, रसवरी, गुलाब–जामुन
आदि–आदि
चाहिने र पाइने जति सबै खाँदै
भिरपाखा, जंगल, कुनाकाप्चामा
कसैले नदेख्ने गरी गरिने प्रेम ।

प्रेमको नाटक रचेर
काम र माम दिन्छु भन्दै
प्रेम अनि प्रेमिकाहरुलाई बेचिने प्रेम
यौवनको प्यास मेटाउन
एकाध घण्टालाई
जे–जे माग्छन्,
त्यही– त्यही दिएर
तथास्तु भनिने प्रेम ।
ए हजुर भन्नोस् न हजुरलाई
कति पैसाको कति प्रेम
किनेर दिउँ ?

यति बेला म
प्रेमको हाटबजारमा
उभिएकी छु ।
जीवनभरिलाई चाहिने
अमूल्य प्रेम किन्नलाई
मुटुभरिको
माया लिएर बसेकी छु ।
अँ–हँ दुर्भाग्य,
विश्व प्रेम बजारको
आधुनिक मार्केटमा
मलाई चाहिले
प्रेम भेटिन तैपनि
आज प्रेम दिवस
हामी सबैलाई
चाहिने भन्दा बढी
पाइने भन्दा धेरै
प्रेमको अजर र अमर शुभकामना ॥

०००
स्याङ्जा