नेपाली हास्यव्यङ्ग्य अनलाइन पत्रिका

रामप्रसाद पन्थी :

नयाँवर्ष आयाे भन्छन् साथीभाइ सबैजना
मैले देख्न सक्या छैन कहिँ कतै नयाँपना ।

आँखा मिची रातैभर पर्खी बसेँ नयाँवर्ष
आशा राखें ल्याउँछ कि जनतामा नयाँ हर्ष ।

रात ढल्याे दिन बित्याे देखिएन नयाँ केही
जुन उहीँ घाम उहीँ हावापानी छाया उहीँ ।

फेरिएको छ कि कतै मानिसकाे आनीबानी
खाेजी हिडें दिनैभर तर भएँ पानी पानी ।

माग्नेहरू माग्दै थिए पसारेर दुई हात
काेही किन दिन्थ्याे तर सित्तै निस्ताे बासी भात ।

हुनेखाने जुटे खाए रक्सी मासु हुक्का तास
हर्षसाथ खर्च गरी नयाँवर्ष पारे खास ।

जिन्दावाद मुर्दावाद यथावत थियाे कतै
आक्राेशकाे आगाे देखें दन्किएकाे जताततै ।

सडकमा आन्दोलन एकपछि अर्को देख्छु
कुम्भकर्ण सरकार निदाएकाे मात्रै भेट्छु ।

काेही भन्छन् व्यवस्था नै फेर्नु पर्याे अब यहाँ
काेही भन्छन् मसानकाे भूतप्रेत जाग्छ कहाँ ?

लाेभीपापी व्यभिचारी तस्करले राज गर्ने
नयाँ वर्ष कैले नयाँ हाेला पाप सफा गर्ने ?

कहाँ आयाे नयाँ वर्ष नाैलाे खुसी ल्यायाे कैले
निराशाकाे भुमरीमा राेमलेर गयाे जैले ।

भित्ते पात्राे बदलेर वर्ष नयाँ हुने भए
भन साथी यस्ता वर्ष जिन्दगीमा कति गए ?

०००
रेसुङ्गा न पा २, गुल्मी
२०८२।०१।०१