नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन :

नयाँ वर्ष आयो नयाँ सोच आओस्
बढेको छ मैलो तुरुन्तै हटाओस्
निचोर्ने र चोर्ने हराएर जाउन्
न खाना न दाना हुने बाँच्न पाउन ।१ ।

नयाँले लुटेरासुटेरा नराखोस्
र कालाबजारी समातेर जाकोस्
लडाएर हाँस्नेहरूनै लडाओस्
सडाएर नाच्नेहरूनै सडाओस् ।२ ।

कुनाकन्दरामा नयाँ झट्ट जाओस्
जुरुक्कै लडेका कटेरा उठाओस्
चिनोस् आङढाक्नै नसक्ने ढकाओस्
छिटो वस्त्र न्यानो नयाँले लगाओस् ।३ ।

नराम्रा झमेला नयाँले नल्याओस्
मजाले सबैको चुलो बल्न पाओस्
नयाँले नल्याओस् कतै भाँडभैलो
कसैले नपाओस् चियोगर्न दैलो ।४ ।

छिमेकीहरूले तगारो नलाऊन्
कतै निम्नलाई जुकाले नखाऊन्
मझेरी कसैले गरौअँश भन्ला
नयाँले लखेटोस् उचालेर डन्डा ।५ ।

डँढेलो बढेको नखोजेर पानी
नयाँ झैँ नयाँ होस् असाध्यै सुबानी
निजी स्वार्थ बोक्यो भने हुन्छ हानी
सुधारोस् नयाँले सबै तुच्छ बानी ।६ ।

सबै रोग फाल्ने नयाँ जोश आओस्
नराम्रो सुनामी नयाँले नल्याओस्
बिरामी बँचाओस् नपारोस् बिरामी
सकौँ दङ्ग पर्दै सधैं हाँस्न हामी ।७ ।

म नेपालबासी भनूँ गर्व गर्दै
बँचाएर बाचौँ नयाँ जोश भर्दै
अझै वीरताको निकालेर आँट
चढौँ टाकुरोमा सकौँ हेर्न फाँट।८ ।

कतैबाट ऐइया र आथ्था नआओस्
सबै देशबासी मजाले रमाओस्
स्वदेशी विदेशी सबैको भलाइ
हुने पार्न थालौं यसै भूमिलाई ।९ ।

दुखी देह छाम्दै हिँडोस् यो वसन्त
नहोस् पालुवाको कतैबाट अन्त्य
हिजोआज मान्छे नयाँमा रमाए
भनेको सुनूँ यो शुभेच्छा चढाएँ ।१० ।

०००
चाँगुनारायण, भक्तपुर