नेपाली हास्यव्यङ्ग्य अनलाइन पत्रिका

गणेश शर्मा पौडेल ‘चन्दन’ :

टाठा वाठा चतुराले मन लागी गर
सिधासाधा सज्जनले अन्यायमै मर
बोल्नेको पीठो बिक्ने प्रथा हट्‌ने हैन
रौ चिराको न्याय यहाँ कैल्यै हुने छैन
(१)

उपकारी बाटा सबै साघुरिँदै गए
अधर्मका बाटा सबै फराकिला भए
बन्धन भित्र परेका लक्ष्य जति सबै
जीवनभर लक्ष्यहीन बन्नुपर्ने सधै
(२)

जिन्दगीका आकाशमा सधै काला बादल
कैले पनि नपुरिने दुःखका खाडल
हातको गाँस मुखमा सधैं विष हुने
जुगानुजुग बिती गए कहिले सुख हुने
(३)

बजेटको मागी खाने भाँडा रैछौँ हामी
चाहिँदाको भाँडा भई नचाहिँदा घाँडा
थाहा पायौँ व्यवहारले कच्चा छैनौँ हामी
उमेरले पाका भयौँ बच्चा छैनौँ हामी
(४)

बोकेका छौ काँध भरी ठूलो जिम्मेवारी
लिएका छौँ हृदयमा सच्चा इमान्दारी
कर्मशील बनी काटौँ सुख अनि चैन
आशा गर्ने अर्काको त्यो आशा बा’दुर हैन ।
(५)

घन घोटी बन्चरोझैं वीरको हुन्छ नाम
मुक्ति लागि मसाल बालौँ मिल्छ सलाम ।
(७)

०००
चितवन