नेपाली हास्यव्यङ्ग्य अनलाइन पत्रिका

रामप्रसाद पन्थी :

थाहै हाेला उहिलेका धेरै ऋषिमुनि
हुन्थे अरे ! निक‌ै ज्ञानी गर्भभित्र सुनी ।

अहिलेका जमानाले पनि यहीँ भन्छ
वंशानुगत गुण उस्काे बालकमा जान्छ ।

राखेपछि माताजीले शिशु गर्भभित्र
सुरूभयाे त्यहीँबाट हाम्राे मार्गचित्र ।

रमाउनु हुन्थ्याे माता माेबाइलसित
सुन्थ्याै हामी रमाइला भाइरल गीत ।

डाक्टरले खान भन्थे पाेषणका कुरा
बेला बेला माताजीले लिनुहुन्थ्याे सुरा ।

झर्काेफर्काे बाेली चर्काे सुन्याैं पिताजीकाे
सिक्याैं कुरा मातापिता आफ्नै गुरूजीकाे ।

जे जे कुरा सिक्याैं हामी बसी भुँडी भित्र
ठ्याक्कै उस्तै पायौं हामी बाहिरकाे चित्र ।

जन्मेपछि दूध खायौं बाेतलकाे तानी
माेबाइल देख्न पायौं कति भाग्यमानी ।

खुवाउदा खाना खाजा माेबाइल हुन्थ्यो
हेर्दाहेर्दै माेबाइल भुँडी टन्न हुन्थ्यो ।

सुरू भए जब हाम्रा इस्कुलका दिन
बाबाआमा हाम्रा आफ्नै विपक्षमा किन ?

भन्न थाले बाबू नानी पढ पढ पढ
जिन्दगीको गाेरेटाेमा अब अघि बढ ।

बाबाआमा माेबाइल हेरी मात्रै बस्ने
हामीलाई पढ भनी नियममा कस्ने ?

हेर्छु म त माेबाइल जेजे भए पनि
साथै हुन्छ माेबाइल जहाँ गए पनि ।

गर्भदेखि लाकाे बानी कहाँ छुट्छ त नि
छाेडिदैन माेबाइल ज्यानै गए पनि ।

छाेडेदेखि बाबाआमा माेबाइल हेर्न
सकेदेखि खुसी हुन्थ्याैं अङ्गालाेमा बेर्न ।

खान्थ्याैं हाेला घरायसी पकाएर खाए
घरैकाले बजारका तिर बानी लाए ।

खानुहुन्न भन्छन् काेही बजारका खाना
कुरा एक काम अर्काे मात्रै तानाबाना ।

माेबाइल हेर्दा युवा बिग्रे भन्छन् पाका
देखिदैछन् केटाकेटी राेगी हुन लाका ।

निकाे छैन समाजकाे चालामाला पनि
पछि पछि कस्ताे दिन हुँदै जाला त नि ?

०००
रेसुङ्गा न पा २, गुल्मी
२०८२।०५।१५