नेपाली हास्यव्यङ्ग्य अनलाइन पत्रिका

ई. कुमार खड्का :

यता देश लुटिए पनि उता भत्तेर चलेकै छ
पीरले आँखा ओसिदा मनमा आगो बलेकै छ
आफ्नै खेत चरन भयो बार भत्काई साँढे पस्दा,
टेकोले ठाउँ छोड्यो घर गोठ ढलेको ढलै छ ।१

व्यापारीले लगानी र प्रतिफलमा ध्यान दिन्छन्
फिर्ती, प्राप्ति हुनेभए दान र अनुदान दिन्छन्
समन्वय, शहकार्यको औपचारिक रीत सँगै,
हैसियतको प्रभाव भए खोजेरै सम्मान दिन्छन् ।२

सम्बन्ध शक्ति सन्तुलनको आधारमा हुने गर्छ
सन्तुलन आपसी विनिमयको सारमा हुने गर्छ
सहानुभूति, चाप्लुसीको हिसाब दिगो हुदैनन्, तर
भ्रममा बाँच्ने दया र भीखको बारमा हुने गर्छन् ।३

कुटनैतिक पहल शून्य छ, रोइलो गरेर के काम ?
जनता झुक्याउने नादानहरु ! गफ छरेर के काम ?
गोहीको आँसु झारेर हुन्छ ? अस्तित्व डगाएपछि ?
बेला घर्किन लागिसक्यो अब मेलो भरेर के काम ?४

आत्मबल दृढ गरौं घरभित्रै चोर बसेको बेला
सक्दो बारबन्देज गरौं स्याल, गिद्द पसेको बेला
पूर्वजको वीरता र बलिदानको ॠण तिर्न निम्ति,
शक्तिपुञ्ज निर्माण गरौं राष्ट्र संकटमा फसेको बेला ।५

०००
आलापोट, काठमाडाैं ।
२०८२/०५/०६