नेपाली हास्यव्यङ्ग्य अनलाइन पत्रिका

 डा. बमबहादुर थापा ‘जिताली’:

चम्चालाई फुटाउने आफैँ फुटेका छन् ?
प्लेट फुटे पनि चम्चा सधैँ जुटेका छन् ।
चोरलाई चम्चाले नै खानदिन्छ सारा
चम्चालाई चलाउने भए भातमारा ॥

जल्ले खानदिन्छ उतै सर्वहारा लागे
अन्नबाली फलाउने परदेश भागे ।
यही चाला चल्दा–चल्दै देश रित्तो भयो
चम्चागिरी चलेपछि गतिमति गयो ॥

हेर्दाहेर्दै मुलुक यो एसियामा पहिला
खाँदाखाँदै टाउकेको भुँडी भयो घैला ।
यस्तै चाला चल्यो भने भोलि नाङ्गो हुन्छ
देशै नाङ्गो भयो भने सगरमाथा छुन्छ ॥

गरिबीले सगरमाथा चुम्नेभयो पक्का
विश्वकीर्ति राख्नेलाई छैन लक्का–धक्का ।
चम्चाहरू चम्केका छन् चुली चढेका छन्‌
चराहरू चारो खोजी–खोजी उडेका छन् ॥

चम्चाले नै चलायो मुलुक
सारालाई बनायो भावुक ॥

०००
नागार्जुन न.पा.–१, रानीवन, काठमाडौँ
९८४१४९१०८१