नेपाली हास्यव्यङ्ग्य अनलाइन पत्रिका

डा. बमबहादुर थापा ‘जिताली’

नेपाली ममचा बने दिनदिनै मोटा बने बङ्गुर
नेपाली जनता खिएर मुरली, छोटा बने डङ्गुर ।
यस्तोमा पनि देखियो सदनमा लुट्ने र फुट्ने छल
भारी लक्षण भेटियो मुलुकमा ढाँट्ने उही अक्कल ॥

नोटैनोट लिएर भोट बटुली कोही भए मालिक
हाम्रो गौरव नासियो, शहिदका ढल्ने भए शालिक ।
यस्तो चाल चलाउने र दुहुने राता बने नाशक
मालामाल हुने र चुहुने घ्याम्पा भए शासक ॥

नेपालीपन मासियो र मुलुकी खाता विदेशी भए
कोही लम्पट ती सिँगार्नुछ भनी नाता अगावै गए ।
भालेका भरमा चलेन मुलकै सारा अँध्यारो भयो
हाम्रो देश विकासको चहकिलो चाला र माला गयो ॥

हाम्रो राष्ट्र हराभरा, रहरिलो वैकुण्ठ बन्दै थियो
कल्ले शान्त, उचा, प्रसिद्ध गरिमा ठाडै खसाली दियो ?
मौलाएर दरिद्रता मुलुकमा, राजा अनेकौँ बने
ल्याई दुर्दिन राष्ट्रको ढुकुटीमा खाल्टा हजारौँ खने ॥

चौरासी अनुहार छन् मुलुकमा सौभाग्यशाली भने–
थोत्रा चप्पल लाउने हजुरिया सम्भ्रान्तशाली बने ।
त्यस्ताका दलमा दलाल भरिए गाली तमासै भयो
हाम्रो देश दलालका पहुँचमा नाली समानै भयो ॥

नौटङ्की रसरागमा फनफनी सत्ता घुमेको छ नि !
दोहोरी रण–नीतिमा रहरिलो गिर्दै गयो जीवनी ।
मारामार पछारमा छ घुइँचो मानौँ महाभारत
यस्तो हालतमा पुग्यो मुलुक यो बेहाल भो हालत ॥

०००

२०७७ फागुन ३
नागार्जुन न.पा.–१, रानीवन, काठमाडौँ
९८४१४९१०८१