नेपाली हास्यव्यङ्ग्य अनलाइन पत्रिका

हेमराज पन्त :

बोकी हिंडे जो सपना हजारौं ।
आफ्ना झिना कल्मष भाव मारौं ।।
राखौं सबैमा सत् भाव ताजा ।
हे हन्तकाली अब दूर जाजा ।।
१

भोका र नाङ्गा जनता छ रोगी ।
देखे सयौं दुष्ट अभाव दोषी ।।
कर्तव्यको बोध गरेर ताजा ।
हे हन्तकाली अब दूर जाजा ।।
२

नेपाल हो स्वर्ग भनेर जानौं ।
संस्कारको सौरभ पुष्प ठानौं ।।
सङ्गीत हो मानव चेत बाजा ।
हे हन्तकाली अब दूर जाजा ।।
३

आदर्शमा फुल्दछ जिन्दगानी ।
ज्ञानी सधैं चुम्दछ ज्ञान छानी ।।
हामी बनौं सज्जन शिष्ट भाजा ।
हे हन्तकाली अब दूर जाजा ।।
४

राखौं सबैमा नित भाइचारा ।
नेपाल आमा सबकी सहारा ।।
राम्रो गरे आशिक दिन्छ आजा ।
हे हन्तकाली अब दूर जाजा ।।
५

बोलौं सबै सभ्य र शिष्ट भाषा ।
जल्ने छ कालो मनको निराशा ।।
माया,दया,प्रेम थपौं तकाजा ।
हे हन्तकाली अब दूर जाजा ।।
६

आचारमा निर्मल चित्त पारी ।
फुल्ने छ चाँडै नव फूलबारी ।।
टारिन्छ गर्जो नमिले नि खाजा ।
हे हन्तकाली अब दूर जाजा ।।

०००
पाटन- २, सिलङ्गा, बैतडी