नेपाली हास्यव्यङ्ग्य अनलाइन पत्रिका

हेमराज पन्त :

१. कर्मचारी
बस्थे जो परदेशमा घर किनी नेपालमा जागिर ।
ढेवा मात्र लिने चुसी मुलुक यो पेसा न हो आखिर ।।
सत्ता रावणको भयो मुलुकमा खै राम चिन्ने छ को ।
दोषी नम्बर एक देख्दछु सधैं यो कर्मचारी न हो ।।

२. गुण्डाराज
साँढेको छ मजाक यो मुलुकमा बाच्छा मरे रुन्छ को ।
रित्तो देख्छु दिमाग भाल,पगरी बोले यहाँ सुन्छ को।।
टीका हार छ रक्तको मखमली चीत्कार हो चन्दन ।
बोकी बन्दुक अस्त्र साथ खुकुरी बन्दैछ गुण्डा झन ।।

३. चुनावी खेल
लेख्ने तागत रित्तियो कलममा सुक्दै छ कालो मसी ।
बाचा गर्छ चुनाव काल कलि यो सत्ता र भत्ता डसी ।।
उस्तै देख्छु हिजो र आज अहिले बेग्लै छ कोलाहल ।
रक्सी स्वाद उहीँ छ बोतल नयाँ सुँघ्दा पुरानै जल ।।

०००
पाटन २ सिलङ्गा, बैतडी