नेपाली हास्यव्यङ्ग्य अनलाइन पत्रिका

माथि घुम्टीले
तल सारीले छोप्ली
भनेकी बुहारी
प्यान्ट स्कर्टमा पो घर आउछे
घरमा बस्दा त झन के भन्नु
हाफप्यान्ट कट्टुमात्र लाउछे
थाहछैन यस्तो पहिरन
खै कहाँबाट आको
जे भए पनि मेरी बुहारीलाई
कति सुहाको ।

ससुरालाई ड्याडी भन्छे
जेठाजुलाई दाइ भन्छे
दर्सन ढोक नगरिकन
सबैलाई हाई भन्छे
बुझिएन यस्तो चलन
खै कहाँबाट आको
जे भए पनि मेरी बुहारीलाई
कति सुहाको ।

माइत जादा बाआमालाई
टन्न फलफुल लान्छे
घर आउदा
खाली ब्याग हल्लाउदै आउछे
भोक लाग्यो बुहारी भन्दा
कहिले चिया बिस्कुटको लन्च बनाउछे
कहिले होटेलबाटै डिनर किनी ल्याउछे
थाहै भएन यो प्रबृति
खै कहाँबाट आको
जे भए पनि मेरी बुहारीलाई
कति सुहाको ।

कहिले फ्रिजमा खाना छ भन्दै
श्रीमानलाई बोकी होटेलतिर जान्छे
सुन्याछु अचेल
छोराले हुस्की पिउदा
टन्न बियर तान्छे
बुझिएन यस्तो सस्कृति
खै कहाँबाट आको
जे भए पनि मेरी बुहारीलाई
कति सुहाको ।

कहिले टाउको दुख्यो मम्मी भन्दै
सासुलाई टाउको मिच्न लाउछे
रोटी बनाउन आउदैन भन्दै
कहिले पिठो मिच्न लाउछे
गजब रैछ यस्तो परम्परा
खै कहाँबाट आको
जे भए पनि मेरी बुहारीलाई
कति सुहाको !

दाङ, हाल काठमाडौं