सोचेका छौ ?
पौरख गर्नु जरुरी छ के के गर्छौ, सोचेका छौ ?
छुट्टी भिन्न हुने भयौ कता पर्छौ, सोचेका छौ ?
कान्छो रोज्ला बिच तला ठाइँलो बस्ला भुईंतला
बुइँगलबाट कसोगरी तल झर्छौ, सोचेका छौ ?
पारी जाने काठेसाँघु अर्को भाइले रोज्न सक्ला
खेती गर्न के कसरी पारि तर्छौ, सोचेका छौ ?
अवल दोएम बाँड्नु पर्ला सिम्सार तिम्रो हुने होला
कुन बारीमा कोदो गहत मकै छर्छौ, सोचेका छौ ?
कुहिएका निदाल, दलिन छानो जैले खस्न सक्छ
आपत बिपत पर्दा कस्को घरमा सर्छौ, सोचेका छौ ?
“भाइ फुटे गवाँर लुटे” बराजुले भन्ने गर्थे
बंशैलाई धावा बोले कति डर्छौ, सोचेका छौ ?
जन्म मृत्यु निश्चय छ, मस्की हो वा ठुस्की मर्ने
के के गरे इज्जतको मराइ मर्छौ, सोचेका छौ ?
२०७१ पौष
काठमाडौं