नेपाली हास्यव्यङ्ग्य अनलाइन पत्रिका

ज्ञान भए पनि ध्यान पुगेन भने ज्यान खतरामा हुन्छ । अनुसन्धानको अभावमा कैयौँ ज्यानहरू खतरामा मात्र हैन कि खतमै भएका छन् । कुरो परापूर्व कालकै भए पनि ध्यान भने हाल मात्र पुग्यो र ज्ञान खुल्यो ।

ऊ बेला मै हुँ भन्ने मर्दहरूले सधैँ भन्ने गर्थे– यी मै’लाहरू “ज्ञान न गुद्धिका सुद्धि न बुद्धिका” हुन्छन् । त्यसैले यी नरपशुलाई पावर देखाएर पछि पार्दै आफू अगि बढ्नु नै मर्दको सच्चा अर्थ हुन्छ । म पनि होला ता नि महान् मान्यजनका महावाणी भन्दै सानी छँदा मानिदिन्थेँ । तर पाको हुँदै जाँदा आको ज्ञानले भने महावाणी भन्दै मानिदिन मान्दै मानेन । बिस्तारै ती वाणीहरू बाण बनेर बिझाउन थाले ।

मैले मनमनै मनन गरेँ र एउटा यस्तो जन्ड ज्ञान पत्ता लाएँ । जुन ज्ञान न त ऊ युगका कुनै मै हुँ भन्ने मर्द मानवसँग थियो, न त यो युगका दादागिरी देखाउने दर्द दानवसँग छ । यो मै’लामा मात्र सीमित यस्तो जाजुल्ले ज्ञान हो “बोक्सीज्ञान” । यस्तो शक्तिशाली बोक्सीज्ञानका बारेमा अध्ययन न पैले कसैले गरे, न अहिले नै कसैले गर्दैछन् । ज्ञानका बारेमा गाउँसहरमा गाइँगुइँ चर्चा चले पनि यो योग्यतालाई अब्बल दर्जाको हो भनेर आवाज उठाउँदै दज्र्यानी चिन्ह दिइएको छैन । कुनै दिन सभा, समारोह र सम्मेलनको आयोजना गरेर पद विभाजन गर्दै पुरस्कार र सम्मानका साथै दोसल्ला पनि ओढाइएको छैन ।

त्यसैले यस्तो अमान्य पक्षपाती परिपाटीप्रति म पूरै प्रतिव्रिmयात्मक छु । यो ज्ञान लिनु र यसमा पारङ्गत हुनु बोक्सी विद्यामा विद्यावारिधि गर्नुजतिकै विशिष्ट हो । यो ज्ञान पाउन धेरै विषयमा प्राक्टिकल अध्ययन गर्नुपर्छ । अध्ययन मात्र नभएर प्रत्येक विषयमा उच्चतम अङ्क ल्याई स्तर अपग्रेड गर्दै जानुपर्छ । पावरफुलै भए पनि यो ज्ञान लिन पुरुषले त चाहेर पनि सक्दैनन् भने मै’लामा पनि सबै मै’लाले “बोक्सीज्ञान” आर्जन गर्न सक्दैनन् । त्यसैले यस्तो ज्ञानमा निकैपटक “खप्परमा ठक्कर” लागेको हुनुपर्छ । यस्ता केही भाग्यमानी खप्परमा मात्र ठक्कर लागेको हुन्छ ।

तपाईंलाई पक्कै लाग्यो होला, बोक्सीज्ञानमा पारङ्गतले आफ्नो योग्यताको कागजी प्रमाण लिएर जाँदा हुन् र प्राध्यापन गर्दा हुन् । कुरो त्यसो होइन, झत्ते प्रमाणपत्रका पाना पल्टाएर हाकिमकहाँ काम्दै हाजिर हुनै पर्दैन । बोक्सी भन्ने बित्तिकै जोकोहीलाई लाग्छ कि एउटा डर लाग्दो र शक्तिशाली जन्तु हो र साँच्चिकै हो पनि । बोक्सीका शक्तिले मुलुकमै उथलपुथल ल्याउँछ, सरकार बनाउँछ र सत्तापरिवर्तन गराउँछ । मन परेकालाई माथिमाथि चढाउँछ र मन नपरेकालाई ठाउँको ठाउँ भक्भकी ढलाउँछ । हुरिबतास र आँधीबेहेरी ल्याउँछ । हालसम्म विश्वमा अध्ययन गरिएका सबै सब्जेक्टभन्दा सर्वश्रेष्ठ सब्जेक्ट नै “बोक्सीज्ञान” हो । यस्तो पावरफुल ज्ञानमा अहिलेसम्म कसैको ध्यान नपुगेर मात्र गुमनाम भएको हो ।

बोक्सीज्ञानमा पारङ्गत हुने मसँग केही सूत्र छन् । कसैलाई नभन्ने हो भने मात्र म तपाईंलाई सुटुक्क भन्छु नत्र… ।
सूत्र—
१. बिहे भएकै हुनुपर्नेछ ।
२. दाइजो नल्याएको भन्दै दिनहुँ झैझगडा र कुटपिट भएको हुनुपर्नेछ ।
३. छोरी मात्र पाएको भन्दै श्रीमानले सौता ल्याएको हुनुपर्नेछ ।
४. श्रीमान र सौताले अंश नदिई घरबाट घोक्रेठ्याक लाएर निकालेको हुनुपर्नेछ ।
५. श्रीमानको मृत्यु भएको र बुढ्यौली लागिसकेको हुनुपर्नेछ ।
६. माइतीले घर खान नसकेर आएकी भन्दै बास नदिएको हुनुपर्नेछ ।
७. जिङ्रिङ्ग कपाल भएकी दुब्ली र पातली हुनुपर्नेछ ।

यी सातओटै सूत्रवत् सब्जेक्टमा उच्चतम अङ्क ल्याई उत्तीर्ण गरेपछि मात्र “बोक्सीविद्या” मा पारङ्गत भएको मानिनेछ । यस्तो कठिन परिश्रमबाट आर्जन गरेका ज्ञानमा ध्यान नपुग्नाले बोक्सीहरूले एउटा परिचयपत्रसम्म पाएको छैन । त्यसैले सम्बन्धित निकायको यसतर्फ चाँडै ध्यान जाओस् भन्ने जानकारी गराउँछु । नत्र बोक्सीहरूको हुल जम्मा भएर हुलदङ्गा गर्नुपर्ला है !
काठमाडौं