नेपाली हास्यव्यङ्ग्य अनलाइन पत्रिका

कहिले असहमतिको हलो अड्काउँदै
कहिले विमतिको फालो लट्काउँदै
हामीले संविधान बनाउन ढिलो गर्न
अनेक कदम चालिम
सबले दबाब दिएपछि
यसो लेखेको जस्तो गर्न थालिम्
यसपाली त साँच्चै
संविधान आउने भो
तर थाह छैन यो आएपछि
कसले के के पाउने हो ।

संविधान बनेपछि
कसैलाई पनि चार दल चाहिँदैन
यसरी ठगी ठगी खान पनि पाइँदैन
त्यसैले जनजातिको कुरो हालेर होस् कि
दलितको बल्छी फालेर होस्
यो संविधान सभालाई
तन्काउनुसम्म तन्काइयो
दुई चार महिना भए पनि
पालै पालो प्रधानमन्त्री पद दन्काइयो
छर छिमेकहरूले पेलेपछि
शुभचिन्तक भन्नेले पनि
अर्कै अर्कै रोल खेलेपछि
आफूले नचाहँदा नचाहँदै पनि
संविधान त साँच्चै आउने भो
तर थाह छैन यो आएपछि
कले के के पाउने हो ।

कसैलाई जातीय राज्य भन्दै
फुलाउनसम्म फुलायौ
कसैले स्वायत्त राज्य भन्दै
भुलाउनसम्म भुलायौ
अझै लम्ब्याउन खोजे पनि
विभिन्न राष्ट्रहरूले बोलेपछि
सञ्चार जगतले पनि हाम्रो पोल खोलेपछि
हामीले नचाहे पनि
संविधान त साँच्चै आउने भो
तर थाह छैन यो आएपछि
कसले के के पाउने हो ।

जनतालाई झुलाउन
कहिले सोह्र बँुदे नाटक गर्यौं
कहिले सात बुँदे नाटक गर्यौं
कहिले चार बुँदेको नाटक गर्यौं त
कहिले बाह्र बुँदेको नाटक गर्यौं
अनेक दाउपेच गर्दै समय तन्कायौँ
मिलीजुली अनेक पद रन्कायौँ
अब त
दवाबै थेग्न नसक्ने भएपछि
साँच्चै संविधान त आउने भो
तर थाह छैन यो आएपछि
कल्ले के के पाउने हो ।
दाङ, हाल– काठमाडौं