नेपाली हास्यव्यङ्ग्य अनलाइन पत्रिका

को भन्छ सत्य त्यो हैन महान् भारत हैन त्यो
नबुझी बोल्नु नै हुन्न श्रेष्ठ मित्र अवश्य त्यो ।
उदार मनको मित्र भूकम्प मर्म बुझ्दछ
खुर्सानी नुन राखेर घाउमा त्यो निचोर्दछ ।

मौनता उसको शैली पर पीडन मन्त्रझैँ
निःस्वार्थ्भित्रको स्वार्थ प्राणघाती रहस्यझैँ ।
मित्रताको नयाँ व्यख्या गर्न दक्ष नमो महान्
महान् भारत हो साँच्चै छेपारा रङ्ग रूपवान् ।

नाकाबन्दी कतै हुन्न स्वप्नमा पनि हुन्न त्यो
फलफूल दिएकै छ तपस्वी मित्रले अहो !
घरभित्र नमिल्नेले परदोष दिए पनि
महान् भारत पर्खन्छ बोल्ने छैन अझै पनि ।

बुद्धको देश त्यो सत्य असत्य बोल्छ को नर
तपस्वी सन्तको वाणी नमो मित्र धुरन्धर !
को हुन् बुद्ध कहाँ जन्मे नमो पण्डित जान्दछन्
नमो द्रष्टा नमो स्रष्टा विश्व नै मूर्ख ठान्दछन् ।

समृद्धि आयु वा सत्ता शक्ति नित्य रहन्छ रे
दम्भ हुङ्कारको शोभा लघुताभित्र गुम्छ रे ।
महान् भारतले आफ्नै विशिष्ट धर्म राख्दछ
मित्रताका सबै शैली नमो भारत चाख्दछ ।

पाखण्ड चटकी धर्म भन्न मिल्दैन है कतै
ब्रत नेपालले बस्दै अर्चना होस् जताततै ।
महान् भारत हे मित्र नमो आत्मा शिला महान्
मित्र नेपालको घात फैलियोस् विश्व कीर्तिमान् ।

काठमाडौं