नेपाली हास्यव्यङ्ग्य अनलाइन पत्रिका

नसोधौं हो ! हालचालै कस्तो छ
यिनले पनि लछार्छन् जस्तो छ ।

खेतमा सब्जी गोठैमा दूध सढ्छ
एकैदिनमा तीनचोटि भाउ बढ्छ
सामान भन्दा रुपियाँ सस्तो छ
यिनले पनि लछार्छन् जस्तो छ ।

उद्योग धन्दा कारखाना बन्द भो
अर्थतन्त्र टुइँकिने छन्द भो
चढ्ने हैन पाताल पो धस्तो छ
यिनले पनि लछार्छन् जस्तो छ ।

साधारणलाई हाहाकार भा’को छ
चोर–तस्करले घरमै सब पा’को छ
महंगीको सर्पले डस्तो छ
यिनले पनि लछार्छन् जस्तो छ ।

राजधानीमा सिँगौरी खेलिन्छ
मधेसलाई मुग्लान झैं हेरिन्छ
फाँटको आगो खरबारी पस्तो छ
यिनले पनि लछार्छन् जस्तो छ ।
देशको हालत दलदलमा फस्दो छ
यिनले पनि लछार्छन् जस्तो छ ।

२०७२ कात्तिक २८
काठमाडौ