नेपाली हास्यव्यङ्ग्य अनलाइन पत्रिका

ए हरि !
के गरेको यो मरी मरी
न खानाको ठेगाना छ
न दानाको ठेगान छ
न मानाको ठेगान छ
न गानाको ठेगान छ
हरेक दिन कमाउनलाई
भोक भोकै कुद्दैछौ
लाने के हो र यो जिन्दगीले
कसको लागि यसरी जुद्दैछौ
ए हरि !
कमसेकम खाने त गर राम्ररी ।

बिहान मन्त्रीको चाकरीमा
साझ सचिवको चाकरीमा
दिउँसो उङ्दै जागिरीमा
कसको लागि यसरी गर्दैछौ
कम्सेकम हेक्का त राख
तिमी पनि एक दिन मर्दैछौ
ए हरि
के गरेको यस्तो भोक भोकै परी परी ?

कहिले भाइको लागि लड्यौ
कहिले छोराको लागि लड्यौ
कहिले छोरीको लागि लड्यौ
आज एक्लै रोगसँग लड्दैछौ
खै को आयो र साथ दिन
आज एक्लै यसरी सड्दैछौ
ए हरि !
तिमीले कमाएको यही रहेछ जिन्दगी भरी ?

तिमी शक्तिमान हुँदा ससुराली आउँथे
घरका आउँथे परका आउँथे
आज तिमी जाँदा न साला आए
न आफ्नै लालाबाला आए
जो आए ती पनि स्यालका छाला आए
थोत्रा टाला आए
ए हरि
के तिमीले कमाएको यही हो जिन्दगीभरी ?

दाङ, हाल काठमाडौं