नेपाली हास्यव्यङ्ग्य अनलाइन पत्रिका

हामीले खुरुखुरु पढौं
सधैं अगाडि बढ्यौ
नेता बिचरा पढाई छोडि छोडि
कहिले ढुङ्गा हान्नेमा व्यस्त भए
कहिले टायर तान्नेमा मस्त भए
कहिले आन्दोलनमा हिंडे
कहिले सरकारसँग भिडे
आज देशको ढुकुटी सकेर
दुई चार पैसो कमाए त के भो
ठेकेदारी दिदा होस् कि
चन्दन ब्यापारीसँग लिँदा होस्
दुई चार करोड समाए त भो
हेर त हाम्रो बुद्धि !
कस्तो उल्टो उल्टो नजर हेरिएछ
हाम्रो भन्दा त नेताज्यूको बुद्धि फेरिएछ ।

हामीले समयमै विवाह गरिम
उनीहरू जेलतिर गए
हामीले समयमै सन्तान उत्पादन
उनीहरू ढिलो बाआमा भए
आज कसैले श्रीमतीलाई समेत
सभासद बनाका छन्
लिने दिनेमा त
बोको भन्दा धेरै गहनाका छन्
हुँदाहुँदा कसैले
छोरा छोरीलाई समेत
राम्रो पद थमाकाछन
नाता बाद कृपा गरे त के भो
हेर त हाम्रो सुद्धि !
कस्तो उल्टो उल्टो नजरले हेरिएछ
हाम्रो भन्दा त राम्रो सोच
बरु नेताज्यूको पो फेरिएछ ।

हामीले दुखले दुइचार पैसो कमायौ
उनिहरूले सजिलै करोडौ कमाए
हामीले कसैलाई बाडेनौ
उनीहरूले टिकटको लागि
पार्टिलाई पनि थमाए
आटिला र गाठिलाहरू प्रतक्ष लडे
छेरुवा र हरूवहरू समानुपातिकमा परे
जे गरे तीनले राम्रै गरे
हेर त हाम्रो अक्कल
कसैलाई तसकरी भनेका छौ
कसैले घुसखोरी भनेका छौं
कस्तो उल्टो नजर हेरिएछ
हाम्रो भन्दा त राम्रो बिचार
नेताहरूमा पो फेरिएछ ।

टिकट पाउन करोडौँ चडाए
चुनाव जित्न खसीबोका लडाए
जितेपछि झन् महँगो जुलुस घन्काए
दुई वर्षको संविधान सभालाई
छ छ बर्ष तन्काए
अलकति भए पनि तलब भत्ता दन्काए
एक वर्षमा दिन्छु भनेको संविधान
विदेश लगेर थन्काए
टनकपुर बेचे पनि, कालापानी बेचे पनि
धोबीखोला बचाए टुकुचा बचाए
हुँदा हुँदा भुकम्प पीडितको नामको
जस्ता पाता पनि खाएर पचाए
देशै बेची खाए पनि के भो त
हेर त हाम्रो खोपडी
कसैलाई जनताघाती भनेका छौँ
कसैलाई राष्ट्रघाती भनेका छौँ
त्यत्रो खर्च गरेर
लगानी उठाउनै पर्यो
अर्को चुनाव आउँदै छ
खर्चपानी जुटाउनै पर्यो
हेर त हाम्रो बुद्धि
कस्तो कस्तो उल्टो नजरले हेरिएछ
हाम्रो भन्दा त तगडा बिचार
नेताज्यूमा पो फेरिएछ ।

दाङ, हाल : काठमाडौं