नेपाली हास्यव्यङ्ग्य अनलाइन पत्रिका

पढ्थ्यौँ इस्कुलमा संगै मसंग नै जान्थ्यो संगै आउँथ्यो
बाटामा लफडा कुरा गरिगरी उफ्रेर चिच्याउँथ्यो
कक्षामा पनि शान्तसंग नबसी हैरान पार्थ्यो तनि
मन्त्री बन्न पुगेछ हेर् त मसिने ! त्यो भूसतिघ्रे पनि

पढ्दा ध्यान दिँदैनथ्यो खुसुखुसु के के कुरा गर्दथ्यो
कक्षाभित्र चलेर दिक्क उसले पार्थ्यो र टेर्दैनथ्यो
केही भन्न हुँदैनथ्यो जति जता जे जे गरेतापनि
मन्त्री बन्न पुगेछ हेर् त मसिने ! त्यो भूसतिघ्रे पनि

कक्षामा उ सधै पछाडितिरको बस्थ्यो नि भित्तातिर
सोधेमा गुरुले कुनै दिनै पनी भन्दैनथ्यो उत्तर
लन्ठुदास थियो, भनेर उसले मानेन कैल्यै पनि
मन्त्री बन्न पुगेछ हेर् त मसिने ! त्यो भूसतिघ्रे पनि

कैल्यै पढ्न र लेख्न ध्यान उसको जादैनथ्यो, मूढ हो
केही मत्लब नै थिएन अरुको, स्वार्थी महामूर्ख हो
छट्टु हो तनि जातिबित्ति अघिकै, ढाँट्थ्यो कुरा जे पनि
मन्त्री बन्न पुगेछ हेर् त मसिने ! त्यो भूसतिघ्रे पनि

कापि पुस्तक चोर्नमा खपिस हो, पैसा पनि चोर्दथ्यो
कैयौं पल्ट त पक्डियो, अफिसमा कार्बाहिमा पर्दथ्यो
नौ जाले र अचम्मकोअघि थियो, उस्तै छ ऐले पनि
मन्त्री बन्न पुगेछ हेर् त मसिने ! त्यो भूसतिघ्रे पनि

नौमा फेल भयो र संगठनमा लागेछ पार्टीतिर
मुड्किको बल चाहिए अघि त्यही हुन्थ्यो र फोर्थ्यो शिर
केही बोल्न सिकेछ ढाँट्न सजिलै जानेछ त्यस्ले पनि
मन्त्री बन्न पुगेछ हेर् त मसिने ! त्यो भूसतिघ्रे पनि

बलेटक्सार- ३, गुल्मी