नेपाली हास्यव्यङ्ग्य अनलाइन पत्रिका

मोरङको कानेपोखरी गाउँपालिकाले कान बनाएछ । संसारकै ठूलो कान बन्यो कि क्या हो ? माननीयहरूले गिनिज बुकमा पाना खाली राख्नु भएको छ कि छैन ? यसो नाउँ लेखाउँन पाइन्थ्यो कि !

कानेपोखरी गाउँपालिकाले ठीक गर्‍यो । कङ्क्रिटको कान, पाँच लाखको कान, पार्क बनेछ, कान हेर्न जानलाई गेट पनि बनेछ, कानलाई हेर्न भनेर आँखा लिएर जानेहरूसँग प्रवेश शुल्क लिनुपर्छ अब ।

हामी सानो हुँदा तिम्रो कान कागले लग्यो भनेर हामीलाई धुरुधुरु रुवाउनेहरूलाई खुच्चिङ । यी देख्यौ कङ्क्रिटको पाँच लाखे कान । कसले बोकेर लाने यत्रा कान ? त्यहीमाथि कानका लागि लाखौंका गेट । गेटमा चाइनिज ताल्चा । ताल्चा खोल्ने कर्मचारी । मन्त्रालयतिर काम नलाग्ने सिसिटिभी छन् भने वरपरका बुट्यानमा टाँस्न पाए यो एक्लो कान जोगिन्थ्यो कि !

कानको काम सुन्ने हो तर पनि हरहिसाब गर्ने कर्मचारीले यहि कानका नाममा खानपान चलाए भनेर मान्छेहरू विनाप्रमाण आरोप लाउँछन् । यही कानले खै के के सुँघ्ने काम गर्‍यो भन्छन् । यत्रा कान टेबलमुनि कसरी पुग्दो हो खै ? यत्रा कान होटलको ढोकाबाटै छिर्दैन भने मुख नभएको कानले त के पो खायो होला खै ?

मान्छेहरू आफ्ना कान थुनेर बस्न सक्दैनन् अनि अरुका कानमाथि व्यर्थमा घान हाल्दछन् । यो अटेरी कानका अघि उभिएर राष्ट्रिय गान गाउँनु छ । कानकै मुनि बसेर खादा, माला लाउनु छ । कान पड्किने गरी शहीदका नाममा भाषण दिनु छ । दुख पर्दा जनतालाई चाउचाउ राशन दिनु छ । कान पाक्नेगरी कान थाक्नेगरी जिन्दावाद र मुर्दावाद गाउँनु छ ।

यस्ता कानको जय जय होस् । यस्ता कानको कीर्ति एक कान दुई कान मैदान होस् ।

०००
फोटोः अनलाइन खबर