नेपाली हास्यव्यङ्ग्य अनलाइन पत्रिका

१. ऊ जस्तो बाठो

एकदिन घरमा पारिवारिक जमघट थियो । फुर्सदमा बच्चाहरूले उफ्रेर दुःख दिन थाले । जेठी फुपूले भन्नुभयो- अहिलेका बच्चाहरू साहै बाठा ! कुरा पनि त्यस्तै, हाम्ले त भ्याउनै नसक्ने भो । यसो भन्दै उहाँ छक्क पर्नुभयो ।

त्यही मौका छोपेर मैले भने- किन नहोस् त ! डाक्टर साहेबले भन्नु भाको, आमा दुई जीउकी हुँदा आमाले जे खान्छिन् पेट भित्रको बच्चाले पनि त्यही खान्छ । त्यस्तो बेलामा आमाले बढी टेलिभिजन हेरिन् भने के हुन्छ ? (त्यहाँ उपस्थित एउटा बाठो बच्चालाई तोकेर भन्दै) ऊ त्यो जस्तै बाठो हुन्छ ।

२. महासचिवको ठट्टा

सिस्नुपानीको देउसी कार्यक्रम २०७४ को क्रममा सचिव सरोज घिमिरेले मोवाईलमा एस.एम.एस. गर्दै लेखे- भरे पाठशाला स्कूलमा निम्तालुहरूको नामावली सहित निम्तो पत्र लिन आउनू !

यो सूचना पाए लगत्तै बेलुका त्यहाँ पुगियो । सिस्नुपानीका सबै पदाधिकारीहरू जमधट भएको ठाँउमा मैले नामावली दिएँ । महासचिव टंकराज आचार्यले हेर्ने वित्तिकै भने- यो माणिक दाइले कतै बितिसकेका मान्छेहरूको नाम त लेखेर ल्याएनन्, अलि राम्री हेर्नुस् है दाइ । यसो भन्दै अध्यक्ष लक्ष्मण गाम्नागेलाई हेर्न दिए । महासचिवको त्यस्तो कुरा सुनेर सबैजना हाँसिरहेको बेलामा अध्यक्षले टाउको हल्लाउँदै भने- छैन छैन ।

३. आजको प्रबन्धक

कार्यालयका साथीभाइसँग कुरा गर्दै बिहानको हाजिरी बजाएँ । आफ्नो कार्य क्षेत्रतिर गएर बसेँ । त्यहीबेला प्रवन्धक, सहायक प्रबन्धक, खजाञ्जी तीनैजना मेरै छेवैमा आएर एकै स्वरमा भन्दै हुनुहुन्थ्यो- आजको प्रवन्धक तपाईं (माणिक) है ! मैले भने- म सहायकलाई कहाँ प्रबन्धक भन्नू भा सर ! गाँठी कुरो के हो ? बुझ्या भए मार्दिनु ! प्रबन्धकले हाँस्दै भन्नुभयो- मैले हाजिर गर्ने ठाउँमा तपाईंले गरेपछि तपाईं प्रबन्धक बन्नु भएन त ! सरको कुरा सुनेर म त ट्वाँ परेँ ।

०००
सरस्वतीनगर, चावहिल