नेपाली हास्यव्यङ्ग्य अनलाइन पत्रिका

रमेश समर्थन :

आकाशमा प्लेन उडाउन मुटु चाहिन्छ, मुटु ! र स्वस्थ मुटुका लागि चाहिन्छ धारा तेल । अन्तर्राष्ट्रिय स्तरको धारा तेल साराले प्रयोग गरौँ । वैदेशिक कम्पनीले विदेशी कच्चा मालबाट स्वदेशमा उत्पादित धारा तेलले तपाईंको मुटुलाई स्वस्थ राख्छ ।

आदरणीय श्रोताहरू, सुन्दै हुनुहुन्थ्यो विज्ञापन प्रसारण । अब छोटो साङ्गीतिक विश्रामपछि हामी फेरि यस्तै विज्ञापनहरू लिएर आउने नै छौँ । अहिलेलाई भने स्विकार्नुस् यो भक्तिसङ्गीत –
राधा भन साराले, शक्ति दिन्छ धाराले …..
नारायण ! हरि ! हरि !

भक्तिका लागि शक्ति चाहिन्छ र शक्ति दिन्छ केवल धाराले । धारा तेल ल्याऔँ र राधाको भक्तिमा रमाऔँ ।
रत्नाकर “मरा मरा” जप्दा “राम” भएर वाल्मीकि बने । तपाईं पनि “धारा धारा” जपेर “राधा” मा लीन हुनुस् ।
आकाशमा प्लेन उडाउन मुटु चाहिन्छ मुटु र स्वस्थ मुटुका लागि चाहिन्छ राधाले खाने गरेको धारा तेल ।

०००
रुपन्देही