नेपाली हास्यव्यङ्ग्य अनलाइन पत्रिका

खाेलाघरे साहिँलाे :

बुख्याँचा बन्नुमा जस्तो मजा होला कहाँ अर्को ?
बनेको सेतु मिल्दो हो विना खोला कहाँ अर्को ?

अरूका जिन्दगी जो छन् सबै धिक्कारका मात्रै
बुख्याँचातुल्य आनन्दी हुने चोला कहाँ अर्को ?

सखा जो दूरका आए,उठाए,ठिङ्ग उभ्याए
सखा त्यस्ता गुणग्राही हुनन् भोला कहाँ अर्को ?

उनैले रङ्ग जे घोल्छन् त्यसैमा रङ्ग फेर्ने हो
सुगाभाषे कि छेपारे मिलोस् घोला कहाँ अर्को ?

रुँगेको फाँट भेडाको यही हो किस्मते थैली
गुमाऊँ यो र के खोजूँ बडो झोला कहाँ अर्को ?

“विधाता”ले जुटाएको दिगो यो शक्ति बुख्याँचा
नरोजे “साहिंलो” भेट्ला कडा गोला कहाँ अर्को ?

०००
“पत्तासाफ” गजलसङ्ग्रहबाट