नेपाली हास्यव्यङ्ग्य अनलाइन पत्रिका

रामशरण न्यौपाने :

आशिष् सुम्पेको प्रकटित छ है कानमा घन्किएको
छोरो होस् यस्तो बहुत गुनिलो कर्ममा होमिएको
आकाङ्क्षा राम्रा जति तय गरी पूर्ण पारूँ सघाऊँ
आमा बाबाका शुभ वचनले यो जगत् जित्न पाऊँ॥१

लेखूँ माटोको मधुर कविता दिव्य पीयूष झारी
पढ्ने सुन्ने नै प्रमुदित बनून् भावनाले सिँगारी
पाटो नेपाली श्रम र सिपले स्वर्ग जस्तै सजाऊँ
आमा बाबाका शुभ वचनले यो जगत् जित्न पाऊँ॥२

पाएँ जो शिक्षा विगत दिनमा छैन मैले भुलेको
सोही ऊर्जाले अनुपम छ यो जिन्दगानी फुलेको
बाटो बिर्सेका जति मनुजमा चेत नौलो जगाऊँ
आमा बाबाका शुभ वचनले यो जगत् जित्न पाऊँ॥३

कैयौँ छन् यात्री यस मुलुकमा मूलबाटो भुलेका
बिर्सी नेपाली जन मुलुक नै व्यर्थ दारी फुलेका
नेपालीका यी घर घर पुगी चेत नौलो फिँजाऊँ
आमा बाबाका शुभ वचनले यो जगत् जित्न पाऊँ॥४

भ्रष्टाचारी छन् अतिशय खुला न्यायले बाँध्न थालूँ
फालौँ यो कालो निशि मुलुकको ज्ञानको दीप बालूँ
दासी बन्दै छन् बहुत जनता मुक्त आजै बनाऊँ
आमा बाबाका शुभ वचनले यो जगत् जित्न पाऊँ॥५

पोख्ने हो मैले अधिक पसिना देशको निम्ति साथी
आफ्नै माटोको उपर दिलमा जाग्छ आस्था ममाथि
मेरो मर्दाङ्गी जन मुलुकको सानमा नै चढाऊँ
आमा बाबाका शुभ वचनले यो जगत् जित्न पाऊँ॥६

०००
भक्तपुर