नेपाली हास्यव्यङ्ग्य अनलाइन पत्रिका

बालकृष्ण खनाल :

भन्दैथे निमुखा हरू सडकमा, उफ्रेर सारा कुरा।
सोचेनौ यिनका पछी छ कि कुनै, सोच्यौ यिनी हुन् भुरा
सारा खाग भयो मिनेट भरमा, औकात थ्यो जेजति।
यस्तैहुन्छ कुरा बुझ्यौ कि अबता, बाटो बिराएपछि।।

मानेनौ जनका कुरा समयमा, जान्ने र बुझ्ने बनी
सूनेनौ कहिलै पुकार जनको, कुर्लेर भन्दा पनि।
आऊनेछ फिरेर त्यो दिन अझै, तिम्ले सुधारे मति
यस्तै हुन्छ कुरा बुझ्यौ कि अब ता, बाटो बिराएपछि।।

झुक्याई जनको दियौ घरिघरी, धोका अनेकाैँ किन
तिम्रै कारण हो बुझ्यौ कि अब ता, आयो हरे यो दिन।
सम्झायौँ कविले गरेर विनती, सुन्दै सुनेनौ रति
यस्तै हुन्छ कुरा बुझ्यौ कि अब ता बाटो बिराएपछि।।

सामन्ती जन जे उधार मनले, गाह्रो छ नेता हुन
राजाले जसरी अनेक रितले, मिच्दै गयौ कानुन।
छोप्यौ कानुनको हिलो घसिघसी, मेटेर कालो मसि
यस्तै हुन्छ कुरा बुझ्यौ कि अब ता, बाटो बिराएपछि।।

सुन्ने आँट गुम्यो घमण्ड बडदा,सानाहरूका कुरा
के गर्छन् र यिनी नसोच कसले, ठानेर साना भुरा।
जे गर्छन् भवमा यिनै मनुजले, गर्छन् सकेको जति
यस्तै हुन्छ कुरा बुझ्यौ कि अब ता, बाटो बिराएपछि।।

०००
टिकापुर, कैलाली