नेपाली हास्यव्यङ्ग्य अनलाइन पत्रिका

हरिशङ्कर परसाईं :

व्यङ्ग्यानुवाद :: रमेश समर्थन

हारेको कांग्रेसी कहाँ जाओस् ?
केवल कांग्रेस मात्र होइन, मन्त्री पनि भएको होस्, पाँच वर्षसम्म खुब तापिएको होस् अनि फेरि आमचुनावमा हार्नु परोस् अनि उसको के होला ? उसका लागि ठाउँ नै कहाँ छ ?
यस्ता व्यक्तिहरूका लागि कांग्रेस र कांग्रेस सरकारको नीति स्पष्ट भएको छ कि यस्ता मानिसलाई कुनै विश्वविद्यालयको उपकुलपति बनाइयोस् ।

हाम्रा मन्त्री चन्द्रभानु गुप्तलाई लखनउ विश्वविद्यालयको उपकुलपति बनाउने प्रयास चलिरहेको छ ।
हाम्रो राज्यमा कैयौं पटक हाम्रा भूतपूर्व मन्त्री उपकुलपति छँदै छन् ।
जसले जनताको विश्वास गुमायो उसलाई शिक्षा विभागमा पठाइदिनुपर्छ । शिक्षा विभाग त फोहर फाल्ने डालो हो । जुन सामान बेकार हुन्छ त्यसलाई त्यसैमा मिल्काउँदै रहनुपर्छ ।

जसको मुख कक्षामा खुल्दैन र जो विद्यार्थीलाई देखेर काँप्न थाल्छ उसलाई प्राध्यापक बनाइदिनुपर्छ । जुन अफिसरहरू सबैतिर नालायक सिद्ध भएका हुन्छन् उनीहरूलाई बढुवा गरेर शिक्षा विभागको अफिसर बनाइदिनुपर्छ ।

कुरा जबलपुर विश्वविद्यालयको उपकुलपति कसलाई बनाउने भन्ने विषयमा चलेको छ । हाम्रो राज्यमा यस पटक कुनै पनि मन्त्रीले हार्ने सौभाग्य प्राप्त गरेनन् । त्यसैले मेरो विचार छ महन्तजीलाई बनाउनुपर्छ । जब उनी एक फुट लामो टिका लगाएर गद्दीमा यस्तो लाग्नेछ मानौं त्रेतायुगका कुनै ऋषि तपोवनको विश्वविद्यालयमा बसेका छन् ।

जब दूधाधारी मठका महन्त सागर विश्वविद्यालयको कोर्टका सदस्य हुन सक्छन् भने महन्त लक्ष्मीनारायण दास उपकुलपति किन बन्न सक्दैनन् ?

०००
यो लघु लेख हिन्दीका सुप्रसिद्ध व्यङ्ग्यकार हरिशंकर परसाईको परसाई रचनावली चारको ‘हारा कांग्रेसी कहाँ जाय ?’बाट अनुवाद गरिएको हो -अनुवादक