नेपाली हास्यव्यङ्ग्य अनलाइन पत्रिका

कविराज घिमिरे :

विकार दूर बन्दछन् प्रयास वृद्धले गरे
विषाक्त डढ्न सक्तछन् सुकार्य वृद्धले छरे
सखाप हुन्छ क्रोध नै मुसुक्क हाँस्छ वृद्ध जो
अझै विशिष्ट जिन्दगी बनोस् अनन्त वृद्धको ॥१

म छर्न सक्छु रोसनी भनी उठेर वृद्धले ।
प्रभात साथमा छँदै जुटी समग्र वृद्धले ॥
कुटो लिएर हातमा छ गोडमेल पुष्पमा
थकान छैन हेर लौ छ ज्योति झन् मुहारमा ।२

बने अजङ्ग वीर यी गरेर उच्च साधना ।
सिकाउँदै अगाडि छन् लिएर स्वच्छ भावना ॥
समाज नै छ वृद्धको भलो निमित्त सादर ।
गरून् बुझेर ज्येष्ठको सबै मिलेर आदर ॥३

नक्षत्र व्यौमको सरी छ कीर्तिमान वृद्धको ।
धरा समान उर्वरा म बन्छु भन्छ वृद्ध यो ॥
छ हातमा मसी यता खुरुक्क लेख्छ काव्य जो
र हान्नसक्छ वृद्धले कडा मिसालसम्म त्यो॥४

वृहत् विचारको कसी छ ज्येष्ठमा विशेषता ।
छ फूलझैँ सुवासना बिनुन् प्रचूर शिष्टता ॥
अहा ! समग्र फाँट नै प्रदीप्त पार्छ को अरू ।
अठोट गर्छ ज्येष्ठले म थाम्नसक्छु आबरु ॥५

०००
भक्तपुर