नेपाली हास्यव्यङ्ग्य अनलाइन पत्रिका

कविराज घिमिरे :

जुरुक्क उठ्छ वृद्धले बहाल गर्छ सिर्जना ।
खटेर भर्छ दिव्यता बिहान मध्य रातमा ।।
युवा तिमी सुत्यौ भने अचम्म मान्छ यो धरा ।
सिनित्त पार सैकडौँ खनी उजाड यी गरा ।।१

हुँदैन न्याय राम्ररी बचेर हिँड्न मुस्किल ।
छ निम्छरोपना यहाँ रुँदै छ आज कोकिल ।।
अपुष्ट दृष्टि सत्यमा असत्य उच्च देखियो ।
छ दुष्ट मुख्य कारणी स्वदेश आज हेपियो ।।२

कला गला निचोरिए छ धर्म नै बलात्कृत ।
चिथोरिए सुभावना कुभावना छ मौलिक ।।
यहाँ छ वृद्ध शोकमा स्वयम् रहेन सन्तति ।
विदेश मोहमा परी गएछ लोकसंस्कृति ।।३

बजेट झ्वाम्म पार्दछन् मिलाउँदै स्वयम् कुरा ।
सखाप योजना भए बढी वरिष्ठ पाखुरा ।।
भएन आड वृक्षको सधैँ छ पाउलो किन ?
स्वदेश आज हेपिँदा समाप्तझैँ छ जीवन ।।४

भएन मूल्य कर्मको पसेन माँड पेटमा ।
गएर मान सान यी युवा परे चपेटमा ।।
सुलुक्क राज्यले निल्यो गएछ घाट उद्यम ।
बुढाबुढी दपेटिए गए विदेश सक्षम ।।५

०००
भक्तपुर