नेपाली हास्यव्यङ्ग्य अनलाइन पत्रिका

कविराज घिमिरे :

चल्दछन् विज्ञका उच्चा कर्माधिकारका सभा ।
सन्मार्गी हुन् पिता हाम्रा माता हुन् चेतना-प्रभा ।।१

पौडिन्छौँ लोकमा हामी आशिष् पाएर सर्वदा ।
पिता हुन् ज्ञानका माला माता हुन् चेतना-प्रभा ।।२

पियाई दुग्धका धारा समायौँ ज्ञानका जरा ।
पिता हुन् दिव्य चौतारी माता हुन् चेतना-प्रभा ।।३

यी हुन् जीवनका मार्ग ज्योतिभन्दा अझै कडा ।
पिता सौजन्य सत्पात्र माता हुन् चेतना-प्रभा ।।४

सन्मार्गमा हिँडुन् भन्दै पढाए जिन्दगी सदा ।
पिता विज्ञानको ज्ञान माता हुन् चेतना-प्रभा ।।५

ऐया आत्थो सबै बुझ्दा उघ्रिए चेतना घडा ।
तत्त्वदर्शी पिता हाम्रा माता हुन् चेतना-प्रभा ।६

शुन्यबाट भयौँ लाख टेकाए विश्व यो धरा !
पिता समृद्धि हुन् साझा माता हुन् चेतना-प्रभा ।।७

गरे छन् ममता माया मानेर उच्च सम्पदा ।
पिता सद्भावका खानी माता हुन् चेतना-प्रभा ।।८

तत्त्वबोध गराएर सिकाए असली कुरा ।
पिता हुन् ज्ञानका दाता माता हुन् चेतना-प्रभा ।।९

वृद्धवृद्धाहरू हाम्रा देवतातुल्य हुन् बडा ।
त्यसैले हुन् पिता मित्र माता हुन् चेतना-प्रभा ।१०

०००
भक्तपुर