नेपाली हास्यव्यङ्ग्य अनलाइन पत्रिका

कृष्णप्रसाद पौडेल जस्ताघरे :

नारी सुन्दरता लतारिन पुग्यो, भन्छन् यहाँ मानव।
चेली भन्न सुहाउने सुजनता, भत्केछ क्यारे! सब।।
मेरो सान अधीनमा बस तिमी, भन्दैन पोसाकले।
तिम्रो सुन्दरता बयान नगरी, मान्दैन यो चित्तले।।-१

छोटा पैरनले चिटिक्क रहँदा, भन्लान् भयौ सुन्दरी ।
तिम्रा अङ्ग प्रत्यङ्गले मनमनै, गर्छन् खिसी हे परी।।
यो वा ऊ कपडा लगाउँछु भनी, भन्छ्यौ खुबै सानले।
तिम्रो सुन्दरता बयान नगरी, मान्दैन यो चित्तले।।-२

घस्छ्यौ लेप खराब व्यर्थपनका, गाला र ओठैभरि।
छोटो कट्टु धरेर घुम्न कसियौ, कल्पेर नानाथरी।।
चेप्टो कम्मर पोटिलो हिप अहो! देखेछ संसारले।
तिम्रो सुन्दरता बयान नगरी, मान्दैन यो चित्तले।।-३

तिघ्रो कम्मर नाइटो पनि खुबै, नाङ्गो गराईकन।
छाती देह छ नग्नता कहरमा, हिँड्छ्यौ नछोपीकन।।
रम्छ्यौ आज कपाल छेदन गरी, त्यो पश्चिमा चालले।
तिम्रो सुन्दरता बयान नगरी, मान्दैन यो चित्तले।।-४

झाँक्रो रङ्गिनको छ केमिकलले, रातो न खैरो छ त्यो ।
नाना रङ्ग अनेक यत्न विधिले, बुट्टा भरेझैँ भयो।।
चुच्चे चप्पल एक हातभरिको,धर्छ्यौ खुबै युक्तिले।
तिम्रो सुन्दरता बयान नगरी, मान्दैन यो चित्तले।।-५

सारी त्याग्न पुग्यौ प्रचण्डपनले, के के ग-यो सोचले।
आफ्नै अङ्ग शरीर लज्जित भए, उत्ताउला वस्त्रले।।
लज्जा तस्बिर रूप फेसबुकमा, राख्छ्यौ बडो गर्वले।
तिम्रो सुन्दरता बयान नगरी, मान्दैन यो चित्तले।।-६

०००
बट्टार, नुवाकोट हाल: बालाजु,काठमाडौं ।
मोबाइल नं. ९८४१७५८१८४