नेपाली हास्यव्यङ्ग्य अनलाइन पत्रिका

लक्ष्मण नेवटिया :

​जिन्दगी के थाहा, बाँकी होला नै कति ?
श्वासको भर पनि त होला नै कति ?
आज हामी हाँसेरै बाँचौं है साथी,
भोलिको खबर पनि त होला नै कति ?

​धन-दौलतको के नै घमण्ड गर्नु र,
साथ लैजाने कुरा छन् नै कति ?
मानवताको दीप जलाऔं मुटुमा,
अहंकारको आयु होला नै कति ?

​माया र सद्भाव बाँड्दै हिँडौं यहाँ,
बाँच्न पाउने अवसर होला नै कति ?
जे गर्नु आजै सुकर्म गरेर सिध्याऔं,
जीवन यात्रा बाँकी होला नै कति ?

​खुसीका छालमा रमाउन सिकौं अब,
दुःखका बादलहरू रहिरहने हुन् कति ?
अन्ततः माटोमै मिल्ने हो यो शरीर,
अमर नाम लेख्ने समय होला नै कति ?

​कोही छैन यहाँ पराई, सबै त आफ्नै हुन्,
विद्वेषको आगो जलाई राख्ने हो कति ?
मिलनका हातहरू बढाऔं अब हामी,
छुट्टिने पलको कुनै भर होला नै कति ?

०००
विराटनगर