नेपाली हास्यव्यङ्ग्य अनलाइन पत्रिका

कृष्णप्रसाद पैडिल ‘जस्ताघरे’ :

गान भर्छ कोइली वसन्तयाम ल्याउन ।
लोकमा अपूर्वको नयाँ खुसी दिलाउन ॥
बागमा सशक्तका मनुष्यकर्म पोखिँदा ।
वृद्धमा खुसी फुलोस् वसन्तले भुलाउँदा॥ -१

छन् नदी र पोखरी विशुद्धका सुधासरि
पालुवा र कोपिला बुट्यान पुष्पमञ्जरी ॥
सूक्ष्म चाल रागले वसन्त यो रमाउँदा ।
वृद्धमा खुसी फुलोस् वसन्तले भुलाउँदा।। – २

बागमा कुँडारमा किसानकर्म देखियो ।
देहमा मुहारमा वसन्तले प्रभा छऱ्यो
खेतमा बगानमा रमेर हेर्न पाउँदा ।
वृद्धमा खुसी फुलोस् वसन्तले भुलाउँदा॥ -३

छन् कुना र कन्दरा गुराँसले सुशोभित ।
गौँथली मुनालका मिलाप छन् अखण्डित॥
नाच्दछिन् वसुन्धरा विभिन्न सार झल्किँदा ।
वृद्धमा खुसी फुलोस् वसन्तले भुलाउँदा॥ -४

गर्वले मनाउँछन् यहाँ वसन्तपञ्चमी ।
हर्षले नियाल्दछिन् सुरम्य दृश्य मेदिनी॥
लेकले, मधेसले, पहाडले, सुझाउँदा ।
वृद्धमा खुसी फुलोस् वसन्तले भुलाउँदा॥ -५

०००
वि.न.पा. -४, बट्टार, नुवाकोट ।