नेपाली हास्यव्यङ्ग्य अनलाइन पत्रिका

हेम अधिकारी :

गाई गोठ छ खालि छैन दुधको थोपो, छ रित्तै कुँडे
हाम्रो शक्ति रहेन खेत अब लौ बारी सबै बाँझिए ।
धारा साउनका झरीसरि भई आँसु झरे धर्धरी
प्यारो यो घरनै उजाड अब भो काम्छौँ सधैँ थर्थरी ॥

जेठो भो निठुरी बधू छ कपटी मातापिता बिर्सिए
कान्छो दुष्ट स्वभावको छ निठुरी झन् त्रास बड्दै गए ।
कान्छो गर्भ तुहेसरी हुन गयो भो आज सातो लिने ।
छोरा छन् तर आस छैन अबता त्यो दागबत्ती दिने ॥

छोरामात्र भनेर आज दुनयाँ अन्धो भएको छ है
छोरी मास्न भनेर लाग्छ यसरी बाटो बिरायो ल है
के के बन्छ विधान मातृदलनै निर्वाध मासिन्छ नि
आफ्नो आगतले अनागत सबै के गर्छ के गर्छ नि ॥

बाँच्ने आश नि छैन छैन अब ता आँखा धमिला भए
आधा होस छ अंग अंग गलिए बोली नबुझ्ने भए
हाम्रो गाउँ सधैँ सधैँ रमिरहोस् सोखी छिमेकी हुनू
हाम्रा लास पवित्र शुद्ध मनले सद्गत् लगी गर्दिनू ॥

०००
दमक, झापा