मनाेज खड्का मिलनम पहिलो व्यक्ति बनेँ
आफ्नै अनुहार हेरेर तर्सिने अन्तिम व्यक्ति हूँ र मेरि आमाको अन्तिम मलामी । अन्तिममा सबै अन्तिमहरूको हिसाबकिताब गर्दा यसरी सबैतिरबाट अन्तिम व्यक्ति बन्ने म पहिलो व्यक्ति बनेँ ।
मनोज खड्का ‘मिलन’ :
म मेरी आमाको
अन्तिम सन्तान हूँ
विद्यालयको
अन्तिम विद्यार्थी
कलेजको
अन्तिम छात्र ।
म
अन्तिम विरोधि
अन्तिम समर्थक
निर्धो व्यवस्थाको
अन्तिम कार्यकर्ता
अन्तिम झोले
फोहोरी संस्थाको ।
म
यो ब्रह्माण्डमा चलिरहेको
दैवलीला मन्चनको
अन्तिम श्रोता
अन्तिम दर्शक
र
अन्तिम व्यापारी
अन्तिम ग्राहक
पैसा नबिक्ने बजारको ।
म
नाजुक सफलताको
अन्तिम आरोही
अन्तिम अवरोही
र
कलमको क्रान्तिको
अन्तिम क्रान्तिकारी लेखक
अन्तिम बौलाहा पाठक ।
मैले कैयौँ समयमा
अन्तिम पटक भनेको छु
कि म अन्तिम वक्ता हूँ
म प्रेमालयको
अन्तिम पागल प्रेमी ।
म
धर्म र विज्ञानको
अन्तिम आलोचक
अन्तिम अनुयायी
र
अन्तिम देशभक्त
अन्तिम देशद्रोही
खोक्रो राष्ट्रवादको ।
म
डार्विन र टोल्सटोयको
अन्तिम शिष्य
अन्तिम योद्धा
एडोल्फ र बोनापार्टको
र
ब्रह्मा र जिससको
अन्तिम सिद्धान्त
आइन्स्टाइन र थोमसको
अन्तिम प्रयोग ।
म
किट्स र टेगोरको
अन्तिम कविता
र
अन्तिम निबन्ध
जेम्स र भैरवको ।
म
आफ्नै अनुहार हेरेर तर्सिने
अन्तिम व्यक्ति हूँ
र
मेरि आमाको
अन्तिम मलामी ।
अन्तिममा
सबै अन्तिमहरूको
हिसाबकिताब गर्दा
यसरी
सबैतिरबाट अन्तिम व्यक्ति बन्ने
म पहिलो व्यक्ति बनेँ ।
०००
सुखड, कैलाली
Nice sir
गजब