नेपाली हास्यव्यङ्ग्य अनलाइन पत्रिका

मनाेज खड्का ‘मिलन’:

बगैंचामा यो माहोल छ कहाँ सोच्यौँ
फूलले जम्मै राज खोल्छ कहाँ सोच्यौँ ?

मखमलको माला लिएर गयौँ हामी
सालिक झर्केर बोल्छ कहाँ सोच्यौँ ?

हामीले सोच्यौँ पोल्न आगो चाहिन्छ
बाफले यसरी पोल्छ कहाँ सोच्यौँ ?

नजर लगाइदियौँ नकाव उतारेर
ऐनाले साँचो बोल्छ कहाँ सोच्यौँ ?

आँखाभित्रै बिलाइदियौँ आँखाहरू
आँखाबाहिर भूगोल छ कहाँ सोच्यौँ ?

हीरा झैँ चम्किलो बजारको दिलमा
कोइलाजस्तो टोल छ कहाँ सोच्यौँ ?

किनारसङ्गै सपना देख्न थाल्यौ हामी
छालले निद्रा बिथोल्छ कहाँ सोच्यौँ ?

०००
कैलाली