नेपाली हास्यव्यङ्ग्य अनलाइन पत्रिका

भीम गौतम :

हल्लै हल्लाले
चेतना हराएको
कानका जाली छेद पर्ने
स्वाठहरूको रंगहीन तालीले
भोकको पीडाले
खाली भएको
ठूलो आन्द्रो
चस्की रहेछ ।

विरक्ति घायल बस्तीमा
पहेला ङिच्च दाँतमाथि
छाडा राजनीति दुष्टले
रमाइलो गर्दै,
ठगी मञ्चबाट उद्घोषण
गास, वास र कपास ।

हिरामोती जन्माउने
किसान मजदुरलाई
किरा सम्झने,
जालीहरूको धड्कनलाई
खबरदार बोल्दै,
भोक, रोग र शोकको लागि
सङ्घर्ष गर्न
हल्लाउ न्यायका अग्ला ढोकाहरू,
खोज लुटेराहरूले लुटेका
बैंकको मौज्दात
अरबौँ धनसम्पत्ति,
सुनका असर्फी र
हिरामोतीका लकरहरू ।

सोध,
क्विन्टल क्विन्टल
सुनको कालो व्यापार
सम्झिँदै जाउ ।
कलिली बाल
निर्मलाको न्याय लुकाउने
दुष्ट न्यायालय र न्यायमूर्तिमाथि
अनि
ठगीका रंगहरू
एनसेल फर्जी बिल र
तिनकरोड नेपालीमाथि
अनगिन्ती जालझेल
भ्रष्टाचार सहित
वाइडबडी घोटाला ।

०००
चितवन