नेपाली हास्यव्यङ्ग्य अनलाइन पत्रिका

कविराज घिमिरे :

छोराछोरी मुटु धुकधुकी प्रेम हुन् जिन्दगी हुन् ।
जस्ता हुन् ती महक सब हुन् सार हुन् भावना हुन् ।।
बाला पीडा पछिपछि हुँदै जा उता चट्ट छोडी ।
भन्दै बाबा हृदयबिचमा बस्तछन् हात जोडी ।।१

आमा भन्छिन् भुवनभरिका पुत्रपुत्रीहरू यी ।
सारा हाँसुन् अतिखुस बनी जन्मिएका सबै ती ।।
भागुन् सारा कपट मलिला देखियुन् शान्त सौम्य ।
यस्तो सोच्छन् जनकजननी चित्त पारेर रम्य ।।२

आफूलाई अलिकति तृषा भोकको याद छैन ।
निद्रा त्याग्छन् पलपल उठी कत्ति आलस्य छैन ।।
बाह्रैमासा सजग रहँदै दिव्य सन्तान पार्छन् ।
प्यारो मान्दै जनकजननी क्लेश हाम्रा बढार्छन् ।।३

राम्रा बन्लान् असलपनका योग्य सन्तान भन्दै ।
शिक्षादीक्षा हितपरकमा बाँड्दछन् सौम्य बन्दै ।।
यस्ता हाम्रा प्रगतिपथका सिर्जनाका प्रतीक ।
बाबा आमा सकलजन हुन् जिन्दगीकै प्रदीप्त ।।४

सम्झौँ हामी दिलभरि यिनै बाबुआमा सबैमा ।
भोकानाङ्गा कति पनि नहुन् शोकसुर्ता कुनैमा ।।
छोराछोरी सकलजनको यो छ कर्तव्य हाम्रो ।
हेरौँ पालौँ सविनय बनी जिन्दगी हुन्छ राम्रो ।।५

०००
भक्तपुर

(चट्याङ मास्टरकाे साैजन्यबाट)