नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
त्यत्ति सजिलै गल्न नजानेको बाबियो हुँ
अँध्यारो विरुद्धमा उज्यालो छर्ने दियो हुँ
निकम्मा ठानी च्यात्ने भए च्यात्दै जानुस्
च्यातेको ठाउँमा सिलाउँदै जाने सियो हुँ ।

२.
झूट्टा प्रशंसाले कान भर्नेहरू त त्यतै छन्
मनमा बस्ने तथा मन पर्नेहरू त त्यतै छन्
गाउँको खबर किन चाहियो सहर पसेपछि
हजुरलाई दुख्दा ऐया गर्नेहरू त त्यतै छन् ।

३.
मनमा पर्नेको सबै राम्रो नपर्नेको चकचक लाग्छ
छँदासम्म फाल्तु हुन्छ गुमाएपछि थकथक लाग्छ
मुख मोड्नेहरू सम्झेर व्यथित नहुनु ए प्रिय मन
पुरानोभन्दा नौलो छवि सबैलाई आकर्षक लाग्छ ।

०००
भैरहवा