नेपाली हास्यव्यङ्ग्य अनलाइन पत्रिका

कविराज घिमिरे :

हिँड्ने बोल्ने काम गर्ने खुलस्त ।
लक्कापक्का जो छ आफैँ छ मस्त ॥
हुन्छन् नाना रोग इत्यादि छिद्र ।
बन्छौँ हामी वृद्धका निम्ति मित्र ॥१

आफ्ना बन्दै छेउमा नित्य बस्छौँ ।
आँधीबेरी दुःखका बात सुन्छौँ ॥
कैयौँ हुन्छन् वेदना भित्रभित्र ।
बन्छौँ हामी वृद्धका निम्ति मित्र ॥२

छुट्टाछुट्टै छन् अनेकौँ समस्या ।
खोली दिन्छौँ भित्रका भीम गाँठा ॥
हल्का हुन्छन् वेदना छन् विचित्र ।
बन्छौँ हामी वृद्धका निम्ति मित्र ॥३

लिन्छौँ हामी ज्ञानका पूर्ण डाली ।
पार्छाैँ हामी तिक्त दुर्भाव खाली ॥
पर्दा आपत् दुःखको फ्याँक्न चित्र ।
बन्छौँ हामी वृद्धका निम्ति मित्र ॥४

बाङ्गोलाई पार्न सोझो भनेर ।
बस्छौँ हामी वृद्धका सामु नेर ॥
यी हुन् गङ्गा धाम हाम्रा पवित्र ।
बन्छौँ हामी वृद्धका निम्ति मित्र ॥५

०००
भक्तपुर !