नेपाली हास्यव्यङ्ग्य अनलाइन पत्रिका

कविराज घिमिरे :

युवकमा अपराध गरे कतिले
कुलतले तन खार्न पुगे कतिले
शुभ हुने कृत कर्म गरी सघन
अधिक पूजित हून् अब ज्येष्ठ जन ।। १

फगत लालचमा न कुदुन् अब यी
निज निमित्त बडा न बनुन् अब यी
घृणित कर्म पखाल्न जुटुन् नयन
अधिक पूजित हून् अब ज्येष्ठ जन ।। २

छ धनकै रटनी कति भ्रष्ट बने
कति त वृद्ध भनाउन लाज बने
सकल गन्ध पखाल्नसकी वदन
अधिक पूजित हून् अब ज्येष्ठ जन ।। ३

कति त हिंसक छन् महिलाप्रति नै
कति गरे अपराध ठुला अति नै
जति भए बदमास अरू नबन
अधिक पूजित हून् अब ज्येष्ठ जन ।। ४

छ महिलाबिचमा पनि भेद यहाँ
अझ वधू कति छन् परपीडनमा
अथक नाश गरी जति छन् जलन
अधिक पूजित हून् अब ज्येष्ठ जन ।। ५

०००
भक्तपुर बुढ्यौली साहित्य समाजको समस्यापूर्तिमा आधारित कविता लेखन अभ्यासबाट