नेपाली हास्यव्यङ्ग्य अनलाइन पत्रिका

कविराज घिमिरे :

फाल्छन् कहाँ समय ती श्रमभित्र खार्छन्
रोपेर बीज विरुवा अनुकूल पार्छन्
अल्छ्याइँ छैन कहिल्यै श्रममै नुहुन्छन्
मातापिता प्रगतिमा नित मग्न हुन्छन् ।। १

चोखो विचार मनमा जहिल्यै उमार्छन्
हुन् पात्र सज्जन यिनै दुनियाँ सपार्छन्
मैलो पखाल्न खटिँदा अति हर्ष मान्छन्
मातापिता प्रगतिमा नित मग्न हुन्छन् ।। २

खर्चेर आयु सबले बलबुद्धि खार्दै
सन्ताननिम्ति दिनऔँ पथचित्र कोर्दै
बन्छन् सदैव अगुवा हितकार लाग्छन्
मातापिता प्रगतिमा नित मग्न हुन्छन् ।। ३

शिक्षा निकेतन बनी बटुली प्रकाश
छर्छन् पवित्र दिलले सब माझ खास
सन्ताननिम्ति धरणी सय बार घुम्छन्
मातापिता प्रगतिमा नित मग्न हुन्छन् ।। ४

यी सौख्यका पगरी हुन् नित मुस्कुराई
बोल्छन् सबैसँग भला हुन चोट खाई
आहा ! सबैतिर भई मनमाझ पुग्छन्
मातापिता प्रगतिमा नित मग्न हुन्छन् ।। ५

०००
भक्तपुर