नेपाली हास्यव्यङ्ग्य अनलाइन पत्रिका

घनश्याम रेग्मी :

(संसद भवनमा निदाउने नेतागणमा केन्द्रित )

१)
बगायौँ रक्तका धारा आउला सभ्य शासन
मिल्नेछ जनमा काम मिल्नेछ खान रासन
आशाा भाँचिए बेर्ना निराशा आज फल्दछ
नेतालाई मिलेका छन् सुत्नका लागि आसन ।

२)
बिहान साँझ दौडिन्छन् भत्ता सत्ता मिलाउन
यसो फुर्सद पाएका कुर्सीमा नै निदाउन
सुख्खाबाट सयौं मान्छे प्रभावित भए पनि
बाढी वा पहिरो आओस् चाहे लागोस् बगाउन ।

३)
सत्ताको मादले मस्त घुर्दै छन् सपना बुनी
दिए हो कसले दैव नेतालाई यही जुनी
हत्याको खेल ख्लेर राज्य सत्ता समाउने
यी आफ्नै जनता बेची पैसाको लाउँछन् धुनी ।

४)
सुत्नका लागि मान्छेका नलेऊ ज्यान है अब
घरैमा सुत पाजी हो भ्रष्टका नाइके सब
सपना देख्नु नै पर्छ राम्रो भोलि बनाउन
निदाओस् मस्त नेतृत्व व्यवस्था गर केशव ।

०००
चितवन