नेपाली हास्यव्यङ्ग्य अनलाइन पत्रिका

कविराज घिमिरे :

आमा भन्ने शब्द नै हो दुहाई
टार्छिन आपत् वेदना ती लुकाई
देखी भोका आँत भर्छिन रमाई
आमा मायाँ गर्दछिन् चित्त लाई ।। १

आफ्नो अर्को भिन्न भिन्नै गराई
बुन्ने जो छन् जाल गाँठो फुकाई
एकै पार्छिन् भावनामा डुबाई
आमा मायाँ गर्दछिन् चित्त लाई ।। २

आमाले नै दुग्धधारा चुसाई
आफ्नो पार्छिन् भोक तिर्खा हटाई .
विपत् पर्दा टार्न सन्तानलाई
आमा मायाँ गर्दछिन् चित्त लाई ।। ३

तोडी दिन्छिन् मानको बाँधलाई
खेप्छिन् आफू दुःख थाहै नपाई
छोराछोरी सौख्य प्यारा जनाई
आमा मायाँ गर्दछिन् चित्त लाई ।। ४

आफ्ना बच्चा ख्याल गर्छिन् फकाई
रोगी बन्दा ल्याउँछिन् यी जँचाई
गर्छिन् सेवा वृद्धको आड पाई
आमा मायाँ गर्दछिन् चित्त लाई ।। ५

जोजो रुन्छन् दुःखले मार खाई
हाँस्ने चाला केछ खोज्छिन् दवाई
यी हुन् साक्षात् लोककी सन्त-माई
आमा मायाँ गर्दछिन् चित्त लाई ।। ६

०००
भक्तपुर