नेपाली हास्यव्यङ्ग्य अनलाइन पत्रिका

कविराज घिमिरे :

म ज्येष्ठ बन्न पाउँदा छ गर्व धन्य धन्य म
छिमेकको समाजको र राष्ट्रको छु गण्य म
हुँदै-हुँदैन लोभको मुहानमा पयोधर
लडाइदिन्छु क्रोध यो अटाउने नयाँघर ।। १

म जालझेलमा कतै अडिन्न बिक्न सक्तिनँ
म ढाँटको अगाडिमा कदापि पर्न सक्तिनँ
म ज्येष्ठको निमित्तमा सदैव गर्छु इज्जत
म लेख्छु बोल्छु गाउँदा हुनेछ ज्येष्ठकै हित ।। २

सिकाउने छु बालमा हितोपदेश नित्य म
युवा जगाउने नयाँ विधान कोर्न थाल्छु म
बनेर प्रौढ मामुली हुँदैन श्रेष्ठ बन्छु म
क्रियाकलापले उँचो युगान्त ज्येष्ठ बन्छु म ।। ३

बनेर वृद्धले यहाँ प्रणाम गर्न लायक
समग्र कर्ममा जुटे हुनेछ प्रेय-नायक
पिँढी सपार्न ज्येष्ठले खटेर जून घाममा
सदैव स्वेद झार्दछन् सकिन्न जोख्न दाममा ।। ४

भलो निमित्त घस्रिने फतक्क देहमा पनि
सुचारु बन्न सक्तछन् नथाक भाइ हो भनी
अहा ! विचित्र यो कला छ ज्येष्ठको सँधैभरि
सुकामना छ वृद्धमा छ आज पर्व यो घरी ।। ५

०००
भक्तपुर