नेपाली हास्यव्यङ्ग्य अनलाइन पत्रिका

कविराज घिमिरे :

भित्री मायाँको रहर चुलिँदा हैमझैँ स्वच्छ पारी
हुर्केका हामी मदनसँगले मिल्न पाई छहारी
आस्था हुन् मेरा हरसमयका चित्त सङ्लो बनाऊँ
आमाबाबाका शुभ वचनले यो जगत् जित्न पाऊँ ।। १

आमाबाबाका खटनसँगले बस्न पाए त हामी
बन्नेछौँ उम्दा भुवनभरिमा लोककै स्वाभिमानी
छातीमा राखी पलपल अहा ! नित्य गाथा म गाऊँ
आमाबाबाका शुभ वचनले यो जगत् जित्न पाऊँ ।। २

सत्कर्मी ज्ञानी पथ सुरभि हुन् चढ्न सक्ने पहाड
फ्याँक्छन् यी सारा जनकजननी जिन्दगीका उजाड
बालूँ आफैँले झलमल दियो अन्ध फाली रमाऊँ
आमाबाबाका शुभ वचनले यो जगत् जित्न पाऊँ ।। ३

द्यौता हुन् मेरा हृदयबिचका बाबुआमा पवित्र
दिन्छन् यी आशिष् नजिक रहँदा रम्न सक्छन् मभित्र
दाता हुन् शिक्षा खुरुखुरु दिने शुद्ध आत्मा मिलाऊँ
आमाबाबाका शुभ वचनले यो जगत् जित्न पाऊँ ।। ४

पार्दै छन् सारा सुजनमतिका दिव्य सन्तानलाई
खट्तै हिँड्दै छन् दिन र निशिमा गर्नलाई भलाइ
गर्मीका हुन् छाया असल मनका शौख्य खोज्दै म जाऊँ
आमाबाबाका शुभ वचनले यो जगत् जित्न पाऊँ ।। ५

हाँस्छन् मेरा यी सुखदपलका कर्मका सान देखी
वैरीका झार्छन् कुनियत यिनै टिक्न सक्तैन सेखी
गङ्गाझैँ चोखा समयगतिका पुण्य आत्मा रिझाऊँ
आमाबाबाका शुभ वचनले यो जगत् जित्न पाऊँ ।। ६

०००
भक्तपुर